भोकर तालुक्यातील खरबीजवळ चार चाकी वाहनाच्या धडकेत दोन भावांचा मृत्यू

नांदेड(प्रतिनिधी)-23 ऑगस्ट रोजी रात्री एका चार चाकी वाहनाने मोटारसायकलला दिलेल्या धडकेत दोन युवक जागीच ठार झाल्याची घटना राष्ट्रीय महामार्ग क्रमांक 61 वर खरबी येथील गणेश ढाब्याजवळ घडली. अपघातात मरण पावणारे दोन्ही युवक बंधू आहेत.
भोकर पोलीस ठाण्याच्या हद्दीतील खरबी गावाजवळ असलेल्या गणेश ढाब्याजवळ अपघात झाल्याची माहिती मिळाल्यानंतर महामार्ग सुरक्षा पथकाचे पोलीस उपनिरिक्षक योगेश भद्रे आणि त्यांचे सहकारी पोलीस अंमलदार तेथे पोहचले. त्या ठिकाणी एका चार चाकी गाडी क्रमांक एम.एच.12 आर.के.3637 ने एका दुचाकी वाहनाला धडक दिली. ज्यावर ताटकळवाडी ता.भोकर येथील गंगाधर बालाजीराव खुपसे (27) आणि साईनाथ बाजीराव खुपसे (25) हे दोन बंधू स्वार होते. चार चाकीने दिलेल्या धडकेत ते दोघे जागीच मरण पावले. चार चाकी गाडी अपघाताच्या स्थळी सोडूनच त्यातील चालक फरार झाला आहे. भोकर पोलीसांनी याप्रकरणी चार चाकी वाहन चालकांविरुध्द गुन्हा दाखल केला आहे.