1 एप्रिलपासून शासकीय कार्यालयात बिना हेल्मेट आला तर 90 दिवसांसाठी परवाना रद्द आणि 500 रुपये दंड

नांदेड(प्रतिनिधी)- दि.1 एप्रिल 2022 पासून शासकीय कार्यालयात जाणाऱ्या प्रत्येक दुचाकी वाहनधारकाने लक्षात ठेवायचे आहे की, हेल्मेट घालून जाणे आवश्यक आहे नसता त्यांच्याविरुध्द मोटार वाहन कायद्यानुसार कार्यवाही होणार आहे आणि त्यांचा परवाना तीन महिने निलंबित करण्यात येणार आहे असे परिपत्रक डॉ.विपीन यांच्या स्वाक्षरीने आज 30 मार्च रोजी निर्गमित करण्यात आले आहे.
शासकीय कार्यालयात येतांना प्रत्येक दुचाकी वाहन चालकाने अर्थात नागरीक, कर्मचारी आणि अधिकारी या सर्वांनी हेल्मेट वापरणे बंधनकारक आहे. रस्ता सुरक्षेच्या दृष्टीकोणातून हा घटनाक्रम महत्वाचा आहे. परिवहन आयुक्त महाराष्ट्र राज्य मुंबई यांनी 22 मार्च 2022 रोजी असे हेल्मेट वापरण्याचे परिपत्रक जारी केलेले आहे. या सर्व आदेशांचा संदर्भ देवून नांदेडच्या जिल्हाधिकाऱ्यांनी नवीन परिपत्रक जारी केले आहे.
नांदेडचे जिल्हाधिकारी डॉ.विपीन यांनी बिना हेल्मेट दुचाकी चालवणाऱ्या नागरीक, कर्मचारी आणि अधिकारी यांच्याविरुध्द दंडात्मक कार्यवाही करावी असे आदेश दिले आहेत. खासकरून शासकीय कार्यालयात येतांना तर दुचाकी चालकांनी हेल्मेट घालणे बंधनकारक आहे. हा आदेश 1 एप्रिल 2022 पासून लागू राहिल. बिना हेल्मेट शासकीय कार्यालयात येणाऱ्या दुचाकी चालकांवर मोटार वाहन अधिनियम 1988 च्या कलम 129 नुसार 500 रुपये दंड आणि त्यांचा दुचाकी वाहन चालक परवाना तीन महिन्यासाठी निलंबित होणार आहे. यासंदर्भाने शासकीय कार्यालयात येणाऱ्या प्रत्येक नागरीक, कर्मचारी आणि अधिकाऱ्यांनी हेल्मेट परिधान करूनच दुचाकीवर प्रवास करायचा आहे याचे लक्ष ठेवायचे आहे असे आवाहन डॉ.विपीन यांनी केले आहे.