नांदेड(प्रतिनिधी)-नांदेड शहरात मागील 25 दिवसापासून पोलीस अवैध शस्त्र बाळगणाऱ्याविरुध्द कार्यवाही करत आहेत. आज शिवाजीनगर पोलीस ठाण्यातील गुन्हे शोध पथकाने एका ऍटोमध्ये वाहतुक होत असलेल्या 25 तलवारी जप्त केल्या आहेत. याप्रकरणी दोन जणांविरुध्द गुन्हा दाखल करण्यात आला आहे.
संजय बियाणी हत्याकांडानंतर नांदेड जिल्ह्यात आणि शहरात अवैध शस्त्र बाळगणाऱ्याविरुध्द पोलीस अत्यंत कडक कार्यवाही करत आहेत. आज शिवाजीनगरचे पोलीस निरीक्षक डॉ.नितीन काशीकर यांना मिळालेल्या माहितीनुसार त्यांनी आपले पथक गोकुळनगर भागात पाठवले. यावेळी शिवाजीनगर पोलीस ठाण्यातील गुन्हे शोध पथकाचे प्रमुख सहाय्यक पोलीस निरीक्षक रवि वाहुळे, पोलीस उपनिरिक्षक सोनकांबळे, पोलीस अंमलदार रामकिशन मोरे, शेख इब्राहिम, दिलीप राठोड, देवसिंग सिंगल आदींनी ऍटो क्रमांक एम.एच.26 एन.5254 ला शोधले. हा ऍटो पोलीस पथकाला पाहुन पुढे जात असतांना या ऍटोचा पाठलाग करून त्या ऍटोस रोड नं.26 शिवाजीनगर नगर नांदेड येथे थांबून त्याची तपासणी केली असता एका पुष्टयाच्या डब्यात 25 तलवारी सापडल्या. पकडलेल्या तलवारीची किंमत 60 हजार रुपये आहे. त्यानुसार आकाश शिवाजी गोरकवाड (19) रा.आमदुरा ता.मुदखेड यास ताब्यात घेतले. या 25 तलवारी हरप्रितसिंघ जसपालसिंघ वसीर (41) यांच्या मालकीच्या आहेत असे आकाश गोरकवाडने सांगितले. त्यानुसार गुन्हा क्रमांक 164/2022 भारतीय हत्यार कायद्याच्या कलम 4/25 नुसार दाखल करण्यात आला आहे. अत्यंत मोठ्या संख्येत तलवारी पकडणाऱ्या शिवाजीनगर पोलीसांचे पोलीस उपमहानिरिक्षक निसार तांबोळी, पोलीस अधिक्षक प्रमोद शेवाळे, अपर पोलीस अधिक्षक निलेश मोरे यांनी कौतुक केले आहे.
