पोलीस अंमलदाराचा मोबाईल चोरून एक लाख 76 हजार रुपये ऑनलाईन चोरले

नांदेड(प्रतिनिधी)-एका पोलीस अंमलदाराचे मोबाईल चोरून त्या मोबाईलमधील सिम कार्डचा वापर करून पोलीस कर्मचाऱ्याच्या बॅंक खात्यातील 1 लाख 76 हजार रुपये वेगवेगळ्या बॅंक खात्यावर हस्तांतरीत केले आहेत.
इतवारा पोलीस ठाण्यातील पोलीस अंमलदार धिरजकुमार गंगाधर कोमुलवार यांनी दिलेल्या तक्रारीनुसार दि.8 ऑगस्टच्या रात्री 9 ते 10 वाजेदरम्यान आनंदनगर रस्त्यावर कोणी तरी त्यांच्या खिशातील 20 हजार रुपये किंमतीचा मोबाईल चोरला. त्यामध्ये जीओ कंपनीचे सिमकार्ड क्रमांक 8378967999 चोरून आपली ओळख लपवून कोमुलवार यांच्या एसबीआय बॅंक खात्यातून 1 लाख 76 हजार रुपये वेगवेगळ्या बॅंकांच्या खात्यावर वर्ग केले. या प्रकरणात चोरलेला मोबाईल आणि बॅंकेतील 1 लाख 76 हजार असा 1 लाख 96 हजार रुपयांचा झटका पोलीस अंमलदार कोमुलवार यांना बसला आहे.
शिवाजीनगर पोलीसांनी याप्रकरणी गुन्हा क्रमांक 321/2022 भारतीय दंड संहितेच्या कलम 379 आणि तंत्रज्ञान कायदा कलम 66 (ब), 66(क) आणि 66(ड) प्रमाणे दाखल केला आहे. पोलीस निरिक्षक नितीन काशीकर हे या प्रकरणाचा तपास करत आहेत.