पात्रताधारकांनी परिपूर्ण कागदपत्रांसह अर्ज करण्याचे आवाहन
नांदेड (प्रतिनिधी)- आणीबाणीच्या कालावधीत (सन 1975 ते 1977) मधील लढा देणाऱ्या व्यक्तींना सन्मान / यथोचित गौरव करण्यासाठी योजना नव्याने सुरु करण्यात आली आहे. या योजनेत शासनाद्वारे मानधन दिले जाणार आहे. पात्रताधारक लाभार्थ्यांनी 15 सप्टेंबर 2018 च्या शासन निर्णयानुसार परिपूर्ण कागदपत्रासह अर्ज 31 ऑक्टोंबर 2022 पर्यंत जिल्हाधिकारी कार्यालयात सादर करावेत, असे आवाहन जिल्हाधिकारी नांदेड यांनी केले आहे.
ही योजना नव्याने सुरु करण्यास 28 जुलै 2022 रोजीच्या शासन निर्णयान्वये मान्यता देण्यात आली आहे. या योजनेतर्गंत आणीबाणीच्या काळात एक महिन्यापेक्षा जास्त कारावास भोगलेल्या व्यक्तींना मासिक 10 हजार रुपये व त्यांच्या पश्चात त्यांच्या पत्नीस / पतीस 5 हजार रुपये मानधन देण्यात येईल. एक महिन्यापेक्षा कमी कारावास भोगलेल्या व्यक्तींना मासिक 5 हजार रुपये तर त्यांच्या पश्चात त्यांच्या पत्नीस / पतीस 2 हजार पाचशे रुपये मानधन अनुज्ञेय राहील. आणिबाणीच्या लढयामध्ये सहभाग घेतलेल्या व्यक्ती ज्यांनी यापूर्वी अर्ज केला नाही त्यांनी अर्जाचा नमुना परिशिष्ट अ व शपथपत्राचा मसुदा परिशिष्ट ब मध्ये माहिती व आवश्यक पुरावा कागदपत्रांच्या प्रमाणित प्रतीसह अर्ज सादर करावेत, असे प्रसिध्दीपत्रकाद्वारे कळविले आहे.
