नांदेड (जिमाका) – शेतकऱ्यांना सामुहिक सेवा केंद्र (सीएससी) धारकांकडे केवळ 1 रुपया भरुन पीक विमा भरता येणार आहे. सीएससी धारकांनी विमा नोंदणी करताना अतिरिक्त रकमेची मागणी केल्यास शेतकऱ्यांनी संबंधित पीक विमा कंपनीचे कार्यालय, तहसिलदार /तालुका कृषि अधिकारी, जिल्हाधिकारी, जिल्हा अधिक्षक कृषि अधिकारी यांचे कार्यालयाशी संपर्क साधावा, असे आवाहन कृषि आयुक्त, सुनील चव्हाण यांनी केले आहे.
प्रधानमंत्री पीक विमा योजना खरीप 2023 ते रब्बी 2025-26 हंगामाकरिता 3 वर्षासाठी अधिसूचित क्षेत्रातील अधिसूचित पिकांसाठी विमा क्षेत्र घटक धरुन राबविण्याचा निर्णय शासनाने घेतला आहे. तसेच सन 2023-24 पासून सर्वसमावेशक पीक विमा योजना राबविण्याचा निर्णय घेतला आहे. शेतकरी हिस्साची विमा हप्ता रक्कम शासनामार्फत भरण्यात येणार आहे. त्यामुळे शेतकऱ्यांना केवळ 1 रुपया भरुन पीएमएफबीवाय पोर्टल https://pmfby.gov.in वर शेतकऱ्यांना तसेच बँक, विमा कंपनी प्रतिनिधी व सामुहिक सेवा केंद्र सीएससी यांचेमार्फत योजनेतील सहभागाची नोंदणी करता येईल. पीक विमा योजनेत सहभागाची नोंदणी करण्यासाठी सामुहिक सेवा केंद्र (सीएससी) धारकांला विमा कंपनीमार्फत प्रति अर्ज रक्कम 40 रुपये देण्यात येते. परंतु राज्यातील काही सामुहिक सेवा केंद्र सीएससीधारकानी शेतकऱ्यांकडून अतिरिक्त पैसे घेण्यात येत असल्याबाबतच्या तक्रारी प्राप्त होत आहेत असे कृषि विभागाने प्रसिध्दीपत्रकाद्वारे कळविले आहे.
