▪️विविध लोकाभिमूख उपक्रमांचे आयोजन
नांदेड (जिमाका) – महसूल विभागाकडून देण्यात येणाऱ्या सेवा आणि राबविण्यात येणाऱ्या योजनांची माहिती नागरिकांना व्हावी व यात लाभधारकांचा सकारात्मक सहभाग वाढावा या उद्देशाने 1 ऑगस्ट महसूल दिनापासून जिल्हा प्रशासनाच्यावतीने महसूल सप्ताहाचे आयोजन करण्यात आले आहे.
मंगळवार 1 ऑगस्ट 2023 रोजी दरवर्षीप्रमाणे महसूल दिन साजरा करण्यात येणार आहे. या कार्यक्रमाचा शुभारंभ ओम गार्डन येथे जिल्हाधिकारी अभिजीत राऊत यांच्या हस्ते होणार आहे. महसूल दिनाचे औचित्य साधून महसूल मंत्री यांनी दिलेल्या निर्देशानुसार महसूल सप्ताह साजरा करण्यात येत आहे.
महसूल दिनाचे औचित्य साधून महसूल सप्ताहामध्ये विविध कार्यक्रमाचे आयोजन करण्यात आले आहे. 1 ऑगस्ट रोजी कार्यक्रमाचा शुभारंभ, 2 ऑगस्ट रोजी युवा संवाद, 3 ऑगस्ट रोजी एक हात मदतीचा, 4 ऑगस्ट रोजी जनसंवाद, 5 ऑगस्ट रोजी सैनिक हो तुमच्यासाठी, 6 ऑगस्ट रोजी महसुली अधिकारी कर्मचाऱ्यांची संवाद इ. कार्यक्रमाचे आयोजन करण्यात येत आहे. महसूल सप्ताहामध्ये विद्यार्थ्यांचे प्रमाणपत्रे, लोकांची महसूल विषयक विविध कामे, सैनिकांची विविध कामे, यासाठी वेगवेगळ्या स्तरावर उपक्रमाचे आयोजन करून जनसहभागाद्वारे लाभार्थ्यांना लाभ देण्यात येणार आहे अशी माहिती जिल्हा प्रशासनाच्यावतीने देण्यात आली आहे.
