नांदेड (जिमाका)- विद्यार्थ्याच्या नवसंकल्पना ना चालना देण्यासाठी व नव उद्योजकांना प्रोत्साहन देण्यासाठी कौशल्य, रोजगार, उद्योजकता व नाविन्यता विभागामार्फत महाराष्ट्र स्टुडंट इनोव्हेशन चॅलेंज चे आयोजन करण्यात येत आहे. या उपक्रमाच्या अधिक माहितीसाठी व नोंदणीसाठी महाराष्ट्र राज्य नाविन्यता सोसायटीच्या अधिकृत संकेतस्थळ www.msin.in अथवा स्टुडंट इनोव्हेशन चॅलेजंच्या www.schemes.msins.in या पोर्टलला भेट द्यावी. तसेच या उपक्रमात जास्तीत जास्त शैक्षणिक संस्था व विद्यार्थ्यांनी सहभागी व्हावे, असे आवाहन कौशल्य विकास रोजगार व उद्योजकता सहायक आयुक्त रेणुका तम्मलवार यांनी केले आहे.
या उपक्रमाचे अनावरण 15 जुलै 2023 रोजी मंत्री कौशल्य रोजगार उद्योजकता व नाविन्यता महाराष्ट्र राज्य यांच्या हस्ते करण्यात आले. राज्यातील सर्व जिल्हयातील विद्यार्थी नवउद्योजक व त्यांच्या नाविन्यपूर्ण कल्पनांचा शोध घेऊन त्यांना आवश्यक व्यासपीठ उपलब्ध करून देणे. या नवउद्योजकांना प्रोत्साहन तज्ञ मार्गदर्शन निधी व आवश्यक पाठबळ पुरवणे हे या उपक्रमाचे प्रमुख उद्दिष्ट आहे.
या उपक्रमात सहभागी होण्यासाठी राज्यातील कोणत्याही महाविद्यालय अथवा औद्योगिक प्रशिक्षण संस्थेत सध्या शिक्षण घेत असलेले विद्यार्थी/विद्यार्थीनी किंवा जास्तीत जास्त 3 विद्यार्थ्यांचा समुह पात्र असेल. तसेच अर्ज करण्यासाठी विद्यार्थी विद्यार्थीनी समुहाकडे नावीन्यपूर्ण संकल्पना असणे आवश्यक आहे. हा उपक्रम 3 टप्यात आयोजित करण्यात येणार आहे. प्रथम टप्प्यात राज्यातील महाविद्यालय औद्यागिक प्रशिक्षण संस्था इतर शैक्षणिक संस्थांची नोंदणी करण्यात येत आहे. नंतर त्या संस्थेतील संस्थेतील विद्यार्थी स्टुडंट इनोव्हेशन चॅलेंजमध्ये आपल्या नव संकल्पनांचे अर्ज करू शकतील. संस्था स्तरावर उत्तम दोन संकल्पनांची निवडही प्रथम टप्प्यात करण्यात येईल.
या उपक्रमाच्या दुसऱ्या टप्प्यात जिल्हयातील सर्व शैक्षणिक संस्थांकडून प्राप्त झालेल्या उत्तम दोन संकल्पनांमधुन सर्वोत्कृष्ट 100 संकल्पनांची जिल्हास्तरीय सादरीकरणासाठी निवड करण्यात येईल. निवडलेल्या 100 नवउद्योजकांसाठी विशेष एकदिवसीय मार्गदर्शन कार्यशाळा आयोजीत करण्यात येईल. जिल्ह्यातील सादरीकरण सत्रातुन सर्वोत्कृष्ट 10 विजेते निवडले जातील. सर्वोत्कृष्ट 10 विजेत्यांमध्ये 30 टक्के महिला 50 टक्के औद्यागिक प्रशिक्षण संस्थांचे विद्यार्थी व एक जिल्हा एक उत्पादन One District One Product संबंधित नव संकल्पनांना प्राधान्य असेल. जिल्हास्तरीय विजेत्यांना प्रत्येकी 1 लाख रुपये बीज भांडवल देण्यात येणार आहे.
या उपक्रमाच्या तिसऱ्या टप्प्यात प्रत्येक जिल्हयातील 10 अशा एकूण 360 नवउद्योजकांना 12 महिन्यांचा विशेष इनक्युबेशन प्रोग्रॉम दिला जाणार आहे. या इनक्युबेशन प्रोग्रामनंतर या 360 नवसंकल्पनांचे राज्यस्तरीय सादरीकरण करण्यात येणार आहे. यातुन सर्वोत्कृष्ट 10 नवउद्योजकांना प्रत्येकी 5 लाख रुपयांचे बीज भांडवल देण्यात येणार आहे. या उपक्रमाची विशेष बाब म्हणजे शैक्षणिक संस्था व जिल्हयांना या उपक्रमाची व्याप्ती वाढवुन राज्याची नावीन्यपूर्ण परिसंस्था बळकट करण्यासाठी विशेष पारितेाषिकही दिले जाणार आहे.
