नांदेड(प्रतिनिधी)-कोरोना काळामुळे बंद असलेल्या पोलीस भरतीची प्रक्रिया लवकर सुरू करावी या मागणीसाठी आज अनेक उमेदवारांनी उपमुख्यमंत्री देवेंद्र फडणवीस यांच्या समक्ष केलेल्या आंदोलनाला सावरतांना पोलीसंाना काहीसे बळ वापरावे लागले.
आज मराठवाडा मुक्तीसंग्राम दिनानिमित्त ध्वजारोहणासाठी उपमुख्यमंत्री देवेंद्र फडणवीस नांदेडला आले होते. या वेळेस श्रीनगर भागातील एका चित्र प्रदर्शनाच्या उद्घाटनासाठी उपमुख्यमंत्री आले असतांना मागील अडीच वर्षापेक्षा जास्त वेळेपासून पोलीस भरतीत यश मिळावे म्हणून तयारी करणाऱ्या अनेक उमेदवारांनी तेथे आंदोलन केले. आंदोलकांना भेटण्यासाठी देवेंद्र फडणवीस त्यांच्याकडे गेले असतांना आंदोलकांनी त्यांना पोलीस भरतीचे निवेदन दिले. पण आंदोलकांची संख्या जास्त आणि या गराड्यात उपमुख्यमंत्री आल्यानंतर पोलीसांची अडचण झाली. उपमुख्यमंत्री आंदोलकांशी बोलत असतांना झालेल्या बाचा-बाचीतनंतर देवेंद्र फडणवीस परत फिरले आणि मग मात्र पोलीसांचा प्रसाद आंदोलकांना मिळाला. पोलीसांनी काहीसा बळाचा वापर करत आंदोलकांना मागे पाडले.
