सीसीटीएनएस कार्यप्रणालीमध्ये ऑगस्ट महिन्यात नांदेड जिल्हा राज्यात प्रथम क्रमांकावर

नांदेड(प्रतिनिधी)-नांदेड जिल्ह्याने सीसीटीएनएसची कामगिरी करतांना ऑगस्ट 2022 च्या कामगिरीत प्रथम क्रमांक पटकावला आहे. अपर पोलीस महासंचालक गुन्हे अन्वेशण विभाग याचा दर महिन्याला आढावा घेत असतात.
नांदेड जिल्ह्यात सीसीटीएनएस प्रणालीने जोडलेले 36 पोलीस ठाणे आहेत. त्यात प्रथम खबर, घटनास्थळ पंचनामे, आरोपी अटक, मालमत्ता जप्ती, दोषारोपपत्र, न्यायालयाचे निकाल, हरवलेले व्यक्ती, अनोळखी मरण पावलेले व्यक्ती, अदखलपात्र खबर, गहाळ/ बेवारस मालमत्ता, प्रतिबंधात्मक कार्यवाही अशा एकूण 18 प्रकारच्या माहिती सीसीटीएनएस प्रणालीमध्ये नोंद करण्यात येतात. या प्रणालीचा दैनंदिन कामकाजात वापर करून गुन्हे प्रतिबंध, गुन्हे उघडकीस आणून उत्तम कामगिरी करण्यात आली. तसेच आयटीएसएसओ, आयसीजेएस आणि सीटीझन पोर्टल आणि ई कम्पलेन, गणेशोत्सव, नवरात्रोत्सव या संदर्भाच्या ऑनलाईन अर्जाची वेळेत निर्गती व प्रभावी वापर केल्याने माहे ऑगस्ट 2022 मध्ये नांदेड जिल्हा पोलीस दलाने 242 पैकी 237 गुण प्राप्त करून महाराष्ट्रात प्रथम क्रमांक पटकावला आहे.
पोलीस अधिक्षक प्रमोद शेवाळे यांच्या मार्गदर्शनात सीसीटीएनएस नोडल अधिकारी अपर पोलीस अधिक्षक निलेश मोरे, विजय कबाडे, सीसीटीएनएस टीमचे पोलीस उपनिरिक्षक रहिम बशीर चौधरी, पोलीस उपनिरिक्षक प्रणिता बाभळे, पोलीस अंमलदार समिर खान मुनीर खान पठाण, ओंमकार सुरेश पुरी, माधव नारायण येईलवाड यांनी केलेल्या परिश्रमांमुळेच नांदेड जिल्ह्याला प्रथमक्रमांक मिळविण्यात यश आलेले आहे.