नांदेड (जिमाका)- राजश्री शाहू महाराज जयंती पर्वा निमित्य 26 जून ते 26 जुलै 2023 या कालावधीत मागासवर्गीय विद्यार्थ्यांसाठी तालुकानिहाय मार्गदर्शन शिबीर व जात वैधता प्रमाणपत्र वितरण कार्यक्रम जिल्हा जात प्रमाणपत्र पडताळणी समितीच्यावतीने आयोजित करण्यात येत आहेत. जिल्हा जात प्रमाणपत्र पडताळणी समितीच्यावतीने जात प्रमाणपत्र व जात वैधता प्रमाणपत्र पडताळणी शिबिर नुकतेच महात्मा ज्योतिबा फुले विद्यालय व कनिष्ठ महाविद्यालय गोकुंदा, किनवट येथे संपन्न झाले.
यावेळी जिल्हा जात प्रमाणपत्र पडताळणी समितीचे लघुलेखक उच्चश्रेणी एम. एस. मुळे, संजय पाटील, मुख्याध्यापक तथा प्राचार्य एच.ए.शेख, उपप्राचार्य एस. के. राऊत, पर्यवेक्षक प्रा. संतोषसिंह बैस ठाकुर व विज्ञान विभाग प्रमुख प्रा. आर.वी. इंगळे यांची उपस्थिती होती.
26 जून ते 26 जुलै या कालावधीत शालेय स्तरावर सर्व मागासवर्गीय विद्यार्थ्यांना जात प्रमाणपत्र व जात वैधता प्रमाणपत्र मुदतीत मिळवण्यासाठी जिल्हा जात प्रमाणपत्र पडताळणी समितीच्या वतीने विशेष मोहिम शिबिराचे आयोजन करण्यात आले आहे. त्यासाठी तालुकानिहाय विशेष शिबिरे आयोजित करण्यात आले आहे. यावेळी या शिबिरास मार्गदर्शन करतांना एम.एस. मुळे यांनी शिबिरामागची भूमिका मांडली.
कार्यक्रमाचे प्रास्ताविक डॉ .प्रा. हेमंत सोनकांबळे यांनी केले. जात पडताळणी समितीचे संजय पाटील यांनी 2023-24 या शैक्षणिक वर्षातील प्रवेशित इयत्ता अकरावी व बारावी विज्ञान शाखेतील मागासवर्गीय विद्यार्थ्यांना जात प्रमाणपत्र मुदतीत मिळविण्यासाठी काय-काय अडचणी निर्माण होतात व त्या कशा पध्दतीने त्या सोडवाव्यात यासंबंधी मार्गदर्शन केले. या मार्गदर्शन शिबीर व जात वैधता प्रमाणपत्र वितरण कार्यक्रमास किनवट तालुक्यातील अनेक कनिष्ठ महाविद्यालयातील विद्यार्थी व पालकांची उपस्थिती होती. या कार्यक्रमाचे सूत्रसंचालन डॉ. प्रा. हेमंत सोनकांबळे यांनी केले तर आभार प्रा. सुबोध सर्पे यांनी मानले.
