शहरातील झाडांना खिळे ठोकून जाहिरात कराल तर गुन्हे दाखल होतील-मनपा

नांदेड(प्रतिनिधी)-शहरातील झाडांना खिळे ठोकून त्यावर जाहिरातील, पोस्टर, बॅनर प्रसिध्द करून शहराचे विद्रुपीकरण करणाऱ्यांविरुध्द फौजदारी गुन्हा दाखल करण्यात येईल असे प्रसिध्दी पत्रक नांदेड वाघाळा शहर महानगरपालिकेचे उद्यान उपायुक्त डॉ.पंजाब खानसोळे यांच्या स्वाक्षरीने प्रसिध्दीसाठी पाठविले आहे.
शहरात मोठ्या प्रमाणात वृक्ष लागवड करण्यात आलेली आहे. काही व्यवसायीक त्यांच्या व्यवसायाची जाहिरात व्हावी या हेतूने रस्त्याच्या कडेला लावलेल्या झाडांना खिळे ठोकून जाहिराती लावत आहेत. तसेच पोस्टर आणि भित्तीपत्रके लावून झाडांना इजा पोहचवत आहेत. तसेच यामुळे शहराचे विद्रुपीकरण होत आहे.
या प्रसिध्दीपत्रकानुसार महानगरपालिकेने सर्व संबंधीतांना आवाहन केले आहे की, ज्यांनी रस्त्याच्या कडेला झाडांना खिळे ठोकून आपल्या जाहिराती केल्या आहेत. त्यांनी हे प्रसिध्दीपत्रक प्रसिध्द झाल्यानंतर तीन दिवसांच्या आत आपल्या सर्व जाहिराती झाडांवरून काढून घ्याव्यात आणि झाडांना ठोकलेले खिळे काढून घ्यावेत. नसता अशी जाहिरात करणाऱ्या लोकांविरुध्द महाराष्ट्र मालमत्तेच्या विरुपणास प्रतिबंध करण्यासाठी 1995 मध्ये तयार करण्यात आलेल्या अधिनियमानुसार जाहिरात प्रसिध्द झाली तेंव्हापासून जवळ असलेल्या पोलीस स्टेशनमध्ये फौजदारी गुन्हा दाखल करण्यात येईल.