भाग्यनगर पोलीसांनी तीन चोरीच्या मोटारसायकल पकडल्या

नांदेड(प्रतिनिधी)-भाग्यनगर पोलीस ठाण्यातील गुन्हे शोध पथकाने एका युवकाला पकडून त्याच्याकडून 3 चोरीच्या दुचाकी जप्त केल्या आहेत. या मुद्देमालाची किंमत 90 हजार रुपये आहे.
पोलीस ठाणे भाग्यनगर येथील गुन्हा क्रमांक 428/2023 बाबत माहिती घेत असतांना 6 नोव्हेंबर रोजी त्यांनी ए.के.संभाजी मंगल कार्यालयाजवळ विना नंबरच्या दुचाकीवर जाणाऱ्या युवकाला थांबवले. त्याची विचारपुस केली असता त्याने ती दुचाकी विशालनगर मोर चौक येथून चोरल्याचे सांगितले.भाग्यनगर गुन्हे शोध पथकाने दुचाकी चोरी करणारा युवक गजानन जर्नाधन नरवड (18) रा.दत्तमंदिर परिसर सोनखेड ह.मु.तेहरानगर नांदेड याची सखोल चौकशी केली असता त्याने चोरलेल्या एकूण तीन गाड्या पोलीसांना काढून दिल्या.
पोलीस अधिक्षक श्रीकृष्ण कोकाटे, अपर पोलीस अधिक्षक अबिनाशकुमार, पोलीस उपअधिक्षक सुरज गुरव यांनी भाग्यनगरचे पोलीस निरिक्षक सुर्यमोहन बोलमवाड, गुन्हे शोध पथकाचे प्रमुख पोलीस उपनिरिक्षक सुनिल भिसे, पोलीस अंमलदार दिलीप राठोड, गजानन किडे, प्रदीप गर्दनमारे आणि हनुमंता कदम यांचे कौतुक केले आहे.