अनोळखी मयत माणसाची ओळख पटविण्यासाठी वजिराबाद पोलीसांचे आवाहन

नांदेड(प्रतिनिधी)-दि.26 फेबु्रवारी रोजी एक 60 वर्षीय अनोळखी पुरूष रेल्वे स्थानकाच्या मुख्यद्वारासमोर मरण पावलेल्या अवस्थेत सापडलेला आहे. वजिराबाद पोलीसांनी या अनोळखी मयताची ओळख पटण्यासाठी शोध पत्रिका जारी केली आहे.
दि.26 फेबु्रवारी रोजी दुपारी 4 वाजेच्यासुमारास रेल्वे स्थानकाच्या मुख्य गेटसमोरच्या ऍटो स्टॅंडजवळ एक 60 वर्षीय अनोळखी पुरूष मरण पावलेल्या अवस्थेत सापडला. या संदर्भाने वजिराबाद पोलीसांनी भारतीय प्रक्रिया संहितेच्या कलम 174 प्रमाणे आकस्मात मृत्यू क्रमांक 10/2022 दाखल केला आहे. या बाबतचा तपास पोलीस निरिक्षक जगदीश भंडरवार यांच्या मार्गदर्शनात पोलीस अंमलदार डी.एस.केंद्रे करीत आहेत.
पोलीसांनी या अनोळखी मयत व्यक्तीची ओळख पटविण्यासाठी शोध पत्रिका जारी केलेली आहे. मरण पावलेल्या अनोळखी माणसाचे वय अंदाजे 60 वर्ष आहे. बांधा सडपातळ आहे. रंग काळासावळा आहे. उंची साडे पाच फुट आहे. डोक्याला काळे-पांढरे केस आहेत. त्याने लालरंगाचा फुल बाह्यांचा टी शर्ट आणि विटकरी रंगाची अंडरवेअर परिधान केलेली आहे. त्याच्या डाव्या छातीवर तिळ आहे. या अनोळखी माणसाबद्दल कोणास कांही माहिती असेल तर जनतेतील लोकांनी वजिराबाद पोलीस ठाण्यात ही माहिती कळवावी वजिराबाद पोलीस ठाण्याचा दुरध्वनी क्रमांक 02462-236500 आणि डी.एस.केंद्रे यांचा मोबाईल क्रमांक 9970381047 यावर सुध्दा या अनोळखी मयत माणसाबद्दल माहिती देता येईल.